|
今日一開始就去了寨邊位，試一試有無火點仔食餌。走了幾個位都無，只釣到石狗、班仔、細細及鱗。最大條算
Vincent的獅子魚(磅頭)，他中到時，完全無掙扎，好似拉扯垃圾一樣。
哈哈！後來艇家再中多條斤大幾的芝麻斑，到開餐了，見大熱天時不想食飯，今天就買了半隻雞、半隻鴨和一斤燒肉上艇食。燒肉和鴨都正，但隻雞就差些。
最搞笑我們全部人屈在艇尾，突然Vincent 拍我隻腳，我話『咩x野呀 ！』， 他說：『你隻腳趾夾著我包紙包飲品的飲管喎 !!』『哈哈
!!對不起 !! 』
食飽又繼續，照舊釣寨邊，為什麼要釣寨邊？其實今日好濁水，釣深水位機會不大。若果試下寨邊可能有意想不到收穫
!!埋到去不久，艇家和我講拋埋去試下，拋到第三口，有魚咬，試二口下，就轉牙，即抽，一抽就好似開 turbo
地飛埋石，勒都勒不實，艇家見勢色不對，即刻叫其他人收絲，將隻艇搖出大海，不讓它埋石。
玩了成半小時先出水，最好笑，條魚竟然跟著艇尾游，艇家就拼命搖了多個圈。他笑說剛吃的鴨及燒肉，險些嘔埋出來。
撈箕手出場啦，今次就不是我啦！那一個擔當此要職就無謂講啦，何解 !?
因為艇家話他揸撈箕揸到似自由神像一樣，搗到最後都要由艇家操刀箕一射入網，原來係星鱸一條 ！
玩完這口之後，再走多幾個位都無魚咬。收工!!回家斬件入雪櫃，斬之前，過磅~ 9磅正 !!
| 
